ಇನ್ನು ನೀನ್ಯಾರೋ ಮತ್ತೆ ನಾನ್ಯಾರೋ....

ಕಳೆದ ಕನಸುಗಳ ಕಲ್ಮಷವ ತೊಳೆದು ಹರಿಯುತಿಹೆ
ಉಳಿದ ನನಸುಗಳ ಚಿತ್ತಾರವ ಹೆಣೆದು ಸುರಿಯುತಿಹೆ
ಕಲ್ಪನೆಯಲಿ ಮತ್ತೆ  ಕಾಡದಿರಿ ಹಳೆ ನೋವ ಮೊಗವೇ
ಅಲ್ಪವಾದರೂ ಸರಿಯೇ ಸರಿಯದಿರಿ ಹೊಸತು ನಗುವೇ
ಇನ್ನು ನೀನ್ಯಾರೋ ಮತ್ತೆ ನಾನ್ಯಾರೋ....

ಮೂಡಣದಿ ರವಿಕಿರಣ ಹಿಂದಿಗಿಂತಲೂ ವಿಸ್ಮಯ
ಸಂಜೆಯಾಗಸವು ಎಂದಿಗಿಂತಲೂ ರಮಣೀಯ
ಯಾರ ವೈಯಾರದ ದಿಬ್ಬಣಕೆ ಹೊರಟಿಹುದು 
ಯಾರ ಮನಸೊಳಗೆ ನವ ಪ್ರೀತಿ ಹುಡುಕಿಹುದು 
ಸ್ವಲ್ಪವಾದರೂ ಸರಿಯೇ ಸರಿಯದಿರಿ ನಸು ನಗುವೇ 
ಇನ್ನು ನೀನ್ಯಾರೋ ಮತ್ತೆ ನಾನ್ಯಾರೋ....

ಅನವರತ ಹುಡುಕಿ ಸೋತಿಹೆನು ಪ್ರೇಮವನು 
ನೆಮ್ಮದಿಯ ಬಯಸಿ ಮರೆತಿಹೆನು ಎಲ್ಲವನು 
ಯಾರ ಹೃದಯದಲಿ ಮರುಜೀವ ಪಡೆಯುವುದು 
ಯಾರ ಉಸಿರಿನಲಿ ಹಸಿರಾಗಿ ಉಳಿಯುವುದು 
ಕಲ್ಪನೆಯಾದರೂ ಸರಿಯೇ ಸರಿಯದಿರಿ ಹುಸಿ ನಗುವೇ 
ಇನ್ನು ನೀನ್ಯಾರೋ ಮತ್ತೆ ನಾನ್ಯಾರೋ....

ಬೆಂಬಿಡದು ಹಳೆಯ ನೋವುಗಳ ಸರಮಾಲೆ 
ನಂಬಿಕೆಯೇ  ಬದುಕು ಇರಬಹುದು  ದೈವಲೀಲೆ 
ಯಾರ ಮಡಿಲೊಳಗೆ  ಮಗುವಾಗಿ ಹರಿಯುವುದು 
ಯಾರ ಕನಸಲಿ ಮತ್ತೆ ಹೊಸ ಜನ್ಮ ತಾಳುವುದು 
ಶಿಲ್ಪವಾದರೂ ಸರಿಯೇ ಸರಿಯದಿರಿ ಹಸಿ ನಗುವೇ 
ಇನ್ನು ನೀನ್ಯಾರೋ ಮತ್ತೆ ನಾನ್ಯಾರೋ....

ನನ್ನೊಲುಮೆಯ ಸವಿಯೆ ಬಳಿಬಾರೆಯ?

ಕಳೆದಿರುಳ ಕಾರ್ಮೋಡ ಸರಿದಿಂದು ಮುಂಗಾರು
ಮೆಲ್ಲನೆ ಸುರಿಯುತಿಹ ಸೋನೆಮಳೆಯೆ
ಇರದಿರುವ ಬೀಗುಮಾನ ಸರಿದಿಂದು ಮುಂಗುರುಳು
ಮೆಲ್ಲನೆ ಹರಿಯುತಿಹ ರಜನಿಸಿರಿಯೆ
ಬಲುಮರೆತ ಉಯ್ಯಾಲೆ ತೂಗಿ ನಲಿಯುತಿದೆ
ಬಹುದಿನದ ಕನಸುಗಳು ತಾಕಿ ಹೊರಳುತಿದೆ
ನನ್ನೊಲುಮೆಯ ಸವಿಯೆ ಬಳಿಬಾರೆಯ?

                           ಸುಖ ದುಃಖಗಳೇಕೋ ಸೂತಕದ ಎದೆಯೊಳಗೆ
                           ಮನದೊಳಗೊಂದು ಅನರ್ಥ ಚಿತ್ರಪಟ
                           ಅನವರತ ನೆನೆಯುತಿದೆ ನಿನ್ನ ಭಾವಬನದೊಳಗೆ
                           ಕಾಗದದೊಳಗೊಂದು ವಿಚಿತ್ರ ನೋವಪುಟ
                           ಪುಟಿಪುಟಿದು ಪುಡಿಯಾದ ಜೀವವು ಕೊರಗುತಿದೆ
                           ತಡವರಿಸಿ ತಡವಾದ ಶಬ್ದಗಳು ನರಳುತಿದೆ
                           ನನ್ನೊಲುಮೆಯ ಸವಿಯೆ ಬಳಿಬಾರೆಯ?

ವಿರಕ್ತ ಅನುರುಕ್ತ ಮತ್ತೆ  ನಿರುಪಯುಕ್ತ ಪದದೊಳಗೆ
ಮಂಪಿರಿದು ನಿದ್ರಿಸಿದ ಪ್ರೇಮದರಸದೂಟ
ನೋವಕಾವಿನಲಿ ಕಾವಿಯುಟ್ಟು ಮೈಮನದೊಳಗೆ
ಕಂಪಿಸಿದ ಚಂದ್ರನಲಿ ಮೋಹಪಾಶಗಳಾಟ
ಭ್ರಮೆಭ್ರಹ್ಮ ಸೃಷ್ಠಿಸಿದ ಜೀವನವು ಮುಗಿಯುತಿದೆ
ವಚನಗಳ ವಂಚನೆಯ ಚಕ್ರವು ಸವಿಯುತಿದೆ
ನನ್ನೊಲುಮೆಯ ಸವಿಯೇ ಬಳಿಬಾರೆಯ?

                          ತುಂಡು ಮಡಕೆಯ ಚೂರು ತೂತಾದರೇನಂತೆ
                          ತಂಪು ದಳಗಳ ಚಿಗುರು ಒಣಗಿದರೇನಂತೆ
                          ತಲ್ಲಣಿಸಿ ತಬ್ಬಲಿಯು ಜೋರು ಅತ್ತುಕೊರಗಿದರೇನಂತೆ
                          ತಾಪವರಿಯದ ತಿಮಿರ ಸೂರು ಜಾರಿದರೇನಂತೆ
                          ತುಂಬೆಯ ಹೂವು ಪೂಜೆಗೆ ನಿಲುಕುವುದೆ
                          ತಂಬೆಲರ ಕೊರಗು ನಿನಗೆ ತಿಳಿಯುವುದೆ
                          ತನ್ನೊಡಲ ಕನಸೇ ಬಳಿಬಾರೆಯ?
                         

ಬಾರದಿರು ನನ್ನೊಂದಿಗೆ

ನೀ ಬಾರದಿರು ಮತ್ತೆ ನನ್ನೊಂದಿಗೆ

ನೋವ ಕಾವಿನಲಿ ನರಳಿಹ ಜೀವಕೆ

ಕಾದು ಕೊರಗಿ ಮರುಗಿರುವ ಹೃದಯಕೆ 

ಬಳಲಿ ಒಣಗಿಹ ಬಸವಳಿದ ದೇಹಕೆ

ನೀ ಬಾರದಿರು ಮತ್ತೆ ನನ್ನೊಂದಿಗೆ

ತಿಳಿ ಸಂಜೆಯಲಿ ನಕ್ಕು ಮುಳುಗುವ ರವಿಯಂತೆ 

ಇರುಳ ಕಡಲೊಳು ಭ್ರಮೆಯ ನಿಶಾಚರಿಯು ನೀನು 

ಕವಲು ದಾರಿಯ ನಡುವೆ ಸಿಲುಕುವ ನಡೆಯಂತೆ

ಮರುಳ ನೋಟದೊಳು ಕನಸ ವ್ಯಾಪಾರಿಯು ನೀನು

ಬಾರದಿರು ರವಿಯ ದಾರಿಯಲಿ

ಸುಳಿಯದಿರು ನಿಶೆಯ ನಡೆಯಲಿ

ಮನಸ್ಸು ಮೈ ನಿನ್ನದೆನ್ನುವ ವಚನಗಳಂತೆ

ಮುರಿದು ಮಾರುವ ಮನಸ್ಸಿನ ಅರವಳಿಕೆಯು ನೀನು

ತನುವು ಪರರಿಗೆ ಮನವು ಕರಗಿದೆಯಂತೆ

ಸೆಳೆವ ಸುಳಿಯ ಸರಸಕೆ ನರಳಿಕೆಯು ನೀನು

ಬಾರದಿರು ವಚನ ನರಳುವಲಿ

ಸುಳಿಯದಿರು ಮುರಿದ ಮನಗಳಲಿ

ಚಂದ್ರಮೊಗದೊಳು ಕಣ್ಣೀರ ಹನಿಹನಿಯು ಕಲೆಯಂತೆ

ಸನಿಹದಲಿ ನಕ್ಕು ನಲಿಯುತಿಹ ನಕ್ಷತ್ರವು ನೀನು

ಧರೆಯ ಮುಗಿಲಲಿ ನೆನಪಾಗಿ ಮಲಗಿಹೆಯಂತೆ

ನೆಪದ ಬಯಲಿನ ಭಾವಗಳ ವಿಚಿತ್ರವು ನೀನು

ಬಾರದಿರು ಕನಸ ಕಲೆಯಲಿ

ಸುಳಿಯದಿರು ಮುಗಿಲ ನೆರಳಲಿ

                              - ಅಚಲ 

ಶಿವರುದ್ರಪ್ಪರವರಿಗೆ ನುಡಿ ನಮನ

ಕಾಣದ ಕಡಲಿನ ಸಾಮಗಾನದೊಳು

ಕೊಂಚ ಚೆಲುವನು ಕೊಂಚ ಒಲವನು

ಬಿತ್ತಿ ಬತ್ತದೆ ಉಳಿದ ದೀಪವ ಹಚ್ಚಿ

ಜೋಗುಳದ ಮೊರೆತದಲಿ ಬೆರೆತ ರಸಋಷಿ ಕವಿಯೆ

ನಿಮಗಿದೋ ಅನಂತ ನಮನ

ದೇವಶಿಲ್ಪಿಯ ತೆರೆದ ಬಾಗಿಲೊಳು

ಗೋಡೆಯ ಹಣೆಯಲಿ ತೀರ್ಥವಾಣಿಯನು

ಮೆತ್ತಿ ಮುತ್ತಿದ ಅಳಿದ ನೆನಪ ಚುಚ್ಚಿ

ಹಸಿರ ತೇರಿನಲಿ ಬೆರೆತ ರಸಋಷಿ ಕವಿಯೆ

ನಿಮಗಿದೋ ಅನಂತ ನಮನ

ಮೋಡದ ನೆತ್ತಿಯ ಆವರಣದೊಳು

ಅನಾವರಣವಾದ ಕಾಡಿನ ಕತ್ತಲನು

ಚೆಲ್ಲುವ ನಾಲ್ಕು ಹನಿಯ ಮೆಚ್ಚಿ

ಮುರಿದ ನೋವಿನಲಿ ಬೆರೆತ ರಸಋಷಿ ಕವಿಯೆ

ನಿಮಗಿದೋ ಅನಂತ ನಮನ

ವ್ಯಕ್ತಮಧ್ಯದ ತಿರುಗುವ ಚಕ್ರಗತಿಯೊಳು

ಪ್ರೀತಿ ಇಲ್ಲದ ಕಾರ್ತಿಕ ಮಾಸವನು

ಕಣ್ಣೀರ ಕಡಲ ಭಾವದಲಿ ನೆಚ್ಚಿ

ಭವ ಬಂಧನ ಭ್ರಮೆಯಲಿ ಬೆರೆತ ರಸಋಷಿ ಕವಿಯೆ

ನಿಮಗಿದೋ ಅನಂತ ನಮನ

ನನ್ನೊಡಲಲಿ ಹಣತೆಯ ಸಾಲನ್ನು ಕಟ್ಟಿಟ್ಟು

ನಿಮ್ಮ ಮೊಗವನು ಕಾಣದ ಋಣಭಾರವ ಇಟ್ಟು

ಶಿವ ಶಾಂತಿ ರುದ್ರ ಕಾಂತಿಯ ಶಿವರುದ್ರಪ್ಪರಾಗಿ

ನನ್ನ ಮನದಲಿ ಮೆರೆದು ಬೆರೆತ ರಸಋಷಿ ಕವಿಯೆ

ನಿಮಗಿದೋ ಅನಂತ ನಮನ

                                                                       - ಅಚಲ

ಆಗುವುದಾದರೆ ಆಗಿಬಿಡು

ನಿನ್ನ ನೈದಿಲೆಯ ಮೈಯ ಬೆವರಾಗ ಬಯಸುವುದಿಲ್ಲ

ಕಾರಣ ನೀನು ನನ್ನ ಒರೆಸಿಬಿಡುತ್ತೀಯ

ನಿನ್ನ ಸರೋವರದ ನಯನದಲಿ ಕಂಬನಿಯಾಗ ಬಯಸುವುದಿಲ್ಲ

ಕಾರಣ ನೀನು ನನ್ನ ಅಳಿಸಿಬಿಡುತ್ತೀಯ

ಆಗುವುದಾದರೆ ಆಗುತ್ತೇನೆ ನಿನ್ನೆದೆಯ ಬಡಿತ

ಕಾರಣ ನೀನು ನನ್ನ ಉಳಿಸಿಬಿಡುತ್ತೀಯ.....!!!!

ನಿನ್ನ ನೀಳ ಕೇಶರಾಶಿಯಲಿ ಕೂದಲಾಗ ಬಯಸುವುದಿಲ್ಲ

ಕಾರಣ ಬಿಳಿ ಕೂದಲೆಂದು ನನ್ನ ತೆಗೆದುಬಿಡುತ್ತೀಯ

ನಿನ್ನ ಜೇನ ತುಟಿಯಲ್ಲಿ ಬಣ್ಣವಾಗ ಬಯಸುವುದಿಲ್ಲ

ಕಾರಣ ಸಂಜೆಯಲಿ ನನ್ನ ತೊಳೆದುಬಿಡುತ್ತೀಯ

ಆಗುವುದಾದರೆ ಆಗುತ್ತೇನೆ ನಿನ್ನೊಡಲ ಉಸಿರು

ಕಾರಣ ನೀನು ನನ್ನ ಹಿಡಿದಿಡುತ್ತೀಯ......!!!!

ನಿನ್ನ ನುಣುಪಾದ ಕಾಲಿನಲಿ ಗೆಜ್ಜೆಯಾಗ ಬಯಸುವುದಿಲ್ಲ

ಕಾರಣ ನನ್ನ ಬದಲಾಯಿಸಿಬಿಡುತ್ತೀಯ

ನಿನ್ನ ಸ್ನಾನದ ನೀರಿನಲಿ ಇಣುಕಲು ಬಯಸುವುದಿಲ್ಲ

ಕಾರಣ ನನ್ನ ಚೆಲ್ಲಿಬಿಡುತ್ತೀಯ

ಆಗುವುದಾದರೆ ಆಗುತ್ತೇನೆ ನಿನ್ನ ಹಣೆಗೆ ತಿಲಕ

ಕಾರಣ ಮರೆಯದೆ ನನ್ನ ಇಟ್ಟುಬಿಡುತ್ತೀಯಾ.....!!!!

ನನ್ನ ದೇಹ ನಿನ್ನದು ನನ್ನೊಡಲ ಉಸಿರು ನಿನ್ನದು
ನನ್ನ ಹೃದಯ ನಿನ್ನದು ನನ್ನೆದೆಯ ಮಿಡಿತ ನಿನ್ನದು
ನನ್ನ ಪ್ರೀತಿ ನಿನ್ನದು ನನ್ನ ಕನಸಿನ ಸೆಳೆತ ನಿನ್ನದು
ನನ್ನ ಹೆಸರು ನಿನ್ನದು ನನ್ನ ಬಾಳ ನೌಕೆ ನಿನ್ನದು
ಆಗುವುದಾದರೆ ಆಗಿಬಿಡು ನನ್ನ ಜೀವನಾಡಿ
ನನ್ನ ಜೀವವನು ಕೊನೆವರೆಗೂ ಬಿಟ್ಟುಕೊಡುತ್ತೀನಿ ..... 

                                                           - ಅಚಲ 

ನಾನಿಲ್ಲ

ಕತ್ತಲೆಯ ಸುತ್ತಲಲಿ ಮಲಗಿ ತಿಮಿರದಲಿ 
ಸೋತು ಜೋತಾಡಿದ ಕನಸಿನಲಿ ನಾನಿಲ್ಲ
ಕಟ್ಟಿಗೆಯ ಅಟ್ಟದಲಿ ಸುಟ್ಟ ಜ್ವಾಲೆಯಲಿ
ಇಟ್ಟು ಉರಿಸಿದ ನೆನೆಪಿನಲಿ ನಾನಿಲ್ಲ
ನಾನಿಲ್ಲ ನೀನಿರದೆ ಬೆಳಕ ಬೀರುವಲಿ
ಅರುಣನ ಕಿರಣ ಇಣುಕುವಲಿ ನಾನಿಲ್ಲ 

ಹೆಜ್ಜೆಯಲಿ ಗೆಜ್ಜೆಗಳ ಸವರಿ ನಿನಾದದಲಿ
ಕಾಲದ ನಡಿಗೆಯ ನುಡಿಯಲ್ಲಿ ನಾನಿಲ್ಲ
ಆಡಿ ಅಡಿಗಿಟ್ಟ ಆಟಿಕೆಯ ನೆರಳಿನಲಿ
ಬೆರೆತು ಮರೆತಿಹ ಮರೆಯಲ್ಲಿ ನಾನಿಲ್ಲ
ನಾನಿಲ್ಲ ನೀನಿರದೆ ಹುಸಿನಗೆಯ ತೋರುವಲಿ
ಆಟಗಳ ಮಾಟದ ನೋಟದಲಿ ನಾನಿಲ್ಲ

ಚುಕ್ಕಿಯ ಪಕ್ಕದಲಿ ಎಳೆದ ರಂಗೋಲಿಯಲಿ
ರಂಗಾದ ಗುಂಗಿನ ಸಂಗದಲಿ ನಾನಿಲ್ಲ
ಮಿಂಚಿನ ಮಂಚದಲಿ ಬರೆದ ಅಂಚೆಯಲಿ
ಮಿಡಿದ ಚಡಪಡಿಕೆಯ ಪದದಲ್ಲಿ ನಾನಿಲ್ಲ
ನಾನಿಲ್ಲ ನೀನಿರದೆ ಹೊಸ ಪ್ರೀತಿ ಅರಳುವಲಿ
ನವವಧುವ ನಗುವಿನ ನಲಿವಿನಲಿ ನಾನಿಲ್ಲ

ಪಚ್ಚೆ ಹಚ್ಚೆಯ ಹೊದ್ದ ಜರಿತಾರಿ ಸೀರೆಯಲಿ
ನೀರವ ಮಡಿಕೆಯ ಸೆರಗಿನಲಿ  ನಾನಿಲ್ಲ
ನಯವಾದ ನಯನದ ಕಾಡಿಗೆಯ ಸಂಧಿಯಲಿ
ಇಳಿದು ಸುಳಿಯುವ ಕಣ್ಣೀರಿನಲಿ ನಾನಿಲ್ಲ
ನಾನಿಲ್ಲ ನೀನಿರದೆ ಅಂದದ ಪಲ್ಲಕ್ಕಿಯಲಿ
ನೀ ಇಳಿದ ಕ್ಷಣದೊಳಗೆ ಉಸಿರಿನಲಿ ನಾನಿಲ್ಲ 

                                                   - ಅಚಲ 

ಏಕೆ ಕಾಡುವೆ ಸುಮ್ಮನೆ....

ಏಕೆ ಕಾಡುವೆ ಸುಮ್ಮನೆ....
ಇಂದು ನೆನ್ನೆಯದಲ್ಲ ನಾಳೆಯ ತಿಳಿದಿಲ್ಲ
ತಿಳಿ ಹಗಲಿನ ಬೆಳಕಿಗೆ ಹೆಗಲನ್ನು ನೀಡಿಲ್ಲ
ಹೆಗ್ಗುರುತು ಬಿಡಿಸಿಲ್ಲ ಜೀವ ದಡ ಬದುಕಿಲ್ಲ
ನಡೆವ ದಾರಿಯ ತುಂಬ ಹೂವನ್ನು ಹಾಸಿಲ್ಲ
ಕಾಣದ ಒಲುಮೆಗೆ ಇನ್ನೂ ಕಾದಿಹೆನಲ್ಲ 
ಏಕೆ ಕಾಡುವೆ ಸುಮ್ಮನೆ..... 

ಏಕೆ ಕಾಡುವೆ ಸುಮ್ಮನೆ....
ಎದೆಯ ತೋಟದಲೆಲ್ಲು ಬಳ್ಳಿಗಳ ಸೆರೆಯಿಲ್ಲ
ಸೆಲೆಯಿಲ್ಲ ನದಿಯಲ್ಲಿ ಸಿಹಿ ನೀರ ಝರಿಯಿಲ್ಲ
ನೇರ ಪದವಿಲ್ಲ ಬರೇ ನೀರವ ಮೌನ ತುಂಬೆಲ್ಲ
ತಬ್ಬಿದ ಮೌನದಲು ಮಾತು ನಿನ್ನದೇ ಬೇರಿಲ್ಲ
ಬೇರಿರದ ಮರದಲ್ಲಿ ಅವಿತು ಕುಳಿತಿಹೆನಲ್ಲ
ಏಕೆ ಕಾಡುವೆ ಸುಮ್ಮನೆ...... 

ಏಕೆ ಕಾಡುವೆ ಸುಮ್ಮನೆ....
ಕಾಡುವ ಕಣ್ಣಿನಲಿ ಸುರಿದ ತುಸು ಕಂಬನಿಯಿಲ್ಲ
ಕಂಬಗಳ ಬಿಂಬದಲಿ ತೋರಿದ ಸಂಭ್ರಮವಿಲ್ಲ
ಸಂಜೆಯಾ ಸಂತೆಯಲಿ ಹರಿದ ಸಂಗತಿಯಿಲ್ಲ
ಸಂಗಾತಿ ಬಳಿಯಿಲ್ಲ ಬಿಳಿಯ ಮಲ್ಲಿಗೆಯಿಲ್ಲ
ಮೆಲ್ಲಗೆ ಚಳಿಯಲ್ಲು ಅತ್ತು ಬೆವೆತಿಹೆನಲ್ಲ
ಏಕೆ ಕಾಡುವೆ ಸುಮ್ಮನೆ..... 

ಏಕೆ ಕಾಡುವೆ ಸುಮ್ಮನೆ....
ತೋರಣದ ತೀರದಲು ತೂಗುವ ತಳಿರಿಲ್ಲ
ತಾಗುವ ನೋವಿನಲಿ ಸಾರುವ ಪದವಿಲ್ಲ
ಪದಕದಾ ಭೇಟೆಯಲಿ ಬಾಣ ಬಿರುಸುಗಳಿಲ್ಲ
ಬಿರು ಮಳೆಯ ಗಡಿಯಲ್ಲಿ ಪ್ರೀತಿಯಾ ಗುಡಿಯಿಲ್ಲ
ಗುಡುಗಿನ ಭಯದಲ್ಲು ನಿನ್ನ ಹುಡುಕಿಹೆನಲ್ಲ
ಏಕೆ ಕಾಡುವೆ ಸುಮ್ಮನೆ...... 

                                           - ಅಚಲ 

ಯುಗಾದಿ.....

ತರುಲತೆಗಳ ನಾಕದಲ್ಲಿ ಸಪ್ತ ಸುಮದ ಲೋಕದಲ್ಲಿ
ಜೇನ ಸಿಹಿಯ ಪಾಕದಲ್ಲಿ ಮರೆತ ನೋವ ಪದಗಳಲ್ಲಿ
ಅರಗಿಣಿಗಳ ಗಾನದಲ್ಲಿ ಅರಳಿ ಬಂತು ಯುಗಾದಿ
ಬೇವು ಬೆಲ್ಲ ತ್ಯಾಗದಿ... 

ಪ್ರೀತಿಯು ಅರಳಿ ಮರೆತು ತೆರಳಿ ಅಂಧಕಾರ ಬೇವಿಗೆ
ಪ್ರೇಮ ಹೊರಳಿ ಕಲೆತು ಮರಳಿ ಬೆಲ್ಲ ಸವಿಯು ಮೆಲ್ಲಗೆ 
ತ್ಯಾಗ ಅಮರ ಒಲವು ಭ್ರಮರ ಮರಳಿ ಬಂತು ಯುಗಾದಿ
ಸಿಹಿ ಕಹಿಯ ಸ್ನೇಹದಿ.... 

ನೀನು ಯಾರೋ ನಾನು ಯಾರೋ ಉಸಿರ ತುಂಬಿ ಪ್ರೀತಿಗೆ
ಒಲವು ಯಾರೋ ತ್ಯಾಗ ಯಾರೋ ಮರೆತ ಮಾತು ಸುಮ್ಮಗೆ
ಸವಿಯು ನೀನು ನೆರಳು ನಾನು ಹೊರಳಿ ಬಂತು ಯುಗಾದಿ
ನೋವು ನಲಿವ ಲೋಕದಿ... 

ನಿನ್ನ ಸನಿಹ ಬೆಲ್ಲ ವಿರಹ ಬೇವು ಸಮಾಗಮವೇ ಜೀವನ 
ಒಲವು ಗೆಲುವು ಮರೆವು ನೋವು ಜೀವ ಮರಣ ಸಿಂಚನ
ಪುನಃ ಸೇರು ಪ್ರೇಮ ಬೀರು ಹೊಸತು ಬಂಧ ಯುಗಾದಿ 
ನೀನೆ ಎಲ್ಲ ಪ್ರೇಮದಿ.... 

                                                 - ಅಚಲ 

ಮತ್ತೆ ಬಂದಿದೆ ಯುಗಾದಿ.......

ನಿನ್ನೆಡೆಗೆ

ಎಲ್ಲೋ ಜಾರಿದೆ ಮನಸು ನಿನ್ನೆಡೆಗೆ
ಯಾಕೋ ಮಿಡಿದಿದೆ ಹೃದಯ ಒಳಗೊಳಗೆ 
ಎನ್ನ ಜೀವನದ ಹಣತೆ ಆರುವಾಗ
ಹೇಗೋ ಅಲೆದಿದೆ ಉಸಿರು ಹಾಗೆ ಸುಮ್ಮಗೆ 

ಸುತ್ತ ಸತ್ತ ಕತ್ತಲಿನ ನೆತ್ತರಲಿ ಅತ್ತ ಕಣ್ಣೀರು 
ಕೊಟ್ಟು ಸುಟ್ಟ ಭರವಸೆಯ ಮಾತಿನಲಿ ನೆಟ್ಟ ನಿಟ್ಟುಸಿರು
ಎತ್ತಣ ಪ್ರೀತಿ ಎಲ್ಲಿಯ ಒಲವು ಬರಿದೇ ನೋವು
ಜಗ್ಗಿ ತಗ್ಗಿದ ಮನದ ಭಾವದಲಿ ಸುಗ್ಗಿ ನಿನ್ನ ಹೆಸರು

ಮುಚ್ಚಿ ಬಿಚ್ಚಿದ ಪ್ರೇಮ ಓಲೆಯಲಿ ಹಚ್ಚಿ ದಳ್ಳುರಿಯು 
ಹತ್ತಿ ಸುತ್ತಿದ ಪ್ರಣಯ ಬನಗಳಲಿ ಮುತ್ತಿದಾ ಬಲೆಯು
ಬತ್ತುವ ಪ್ರೀತಿ ಜಾರುವ ಒಲವು ಕಾದಿದೆ ಸಾವು
ಇಳಿ ಮಳೆಯ ಮರುಕ ಹನಿಯಲಿ ಸುಳಿ ನಿನ್ನ ಹೆಸರು

ತೂಗಿ ಬಾಗಿ ಮಣಿದ ತ್ಯಾಗದಲಿ ಸಾಗಿ ಬಾರದೆ
ತುತ್ತು ಮುತ್ತಿನ ಶಕುನ ಹಕ್ಕಿಯ ಹೊತ್ತು ತಾರದೆ
ಶೋಕವು ಪ್ರೀತಿ ಮೂಕವು ಒಲವು ಮೌನವು ನಾವು
ಕುಂಚ ಅಂಚಿನ ಬಣ್ಣ ಕರಗುವಲಿ ಪ್ರಪಂಚ ನಿನ್ನ ಹೆಸರು

                                             - ಅಚಲ